XƏBƏRLƏR 2022
Özbəkistandakı Heydər Əliyev adına Azərbaycan Mədəniyyət Mərkəzində Daşkənddə beynəlxalq konfransda iştirak edən Azərbaycan alimləri ilə görüş keçirilib.
Özbəkistanın paytaxtı Daşkənd şəhərində keçirilən 7-ci Beynəlxalq EMI Sahibkarlıq və Sosial Elmlər Konqresində iştirak edən Azərbaycan alimləri - Azərbaycan Dövlət Pedaqoji Universitetinin Quba filialının direktoru, dosent Yusif Alıyev, ADPU Quba filialının Ədəbiyyat və Dillər kafedrasının baş müəllimi Sərxan Cəfərov, Azərbaycan Milli Elmlər Akademiyası akademik Həsən Əliyev adına Coğrafiya İnstitutunun icraçı direktor v.m.i.e. dosent Zakir Eminov, Coğrafiya İnstitutunun Turizm və rekreasiya coğrafiyası şöbəsinin müdiri dosent Zaur İmrani Özbəkistandakı Heydər Əliyev adına Azərbaycan Mədəniyyət Mərkəzini ziyarət ediblər.
Qonaqlarla Azərbaycan Mədəniyyət Mərkəzinin direktoru Samir Abbasov görüşmüş, onlara Mərkəzin fəaliyyəti, onun Azərbaycan-Özbəkistan arasında dostluq, mədəniyyət, humanitar sahədə əməkdaşlığın inkişafına rolu, görülən işlər haqqında geniş məlumat verib.
S.Abbasov qonaqları Mərkəzdəki muzeylər, sərgilər, Mərkəzdə yaradılmış kurs və dərnəklərin işi ilə tanış edib.
Görüşdə birgə əməkdaşlığa dair fikir mübadiləsi aparılıb və gələcəkdə əməkdaşlıq məsələləri müzakirə olunub. Azərbaycan-Özbəkistan arasında təhsil sahəsində əməkdaşlıq, Azərbaycan Dövlət Pedaqoji Universitetinin Quba filialı ilə Özbəkistanın regionlarında olan ali təhsil ocaqları, Termiz Dövlət Universiteti ilə əməkdaşlığın yaradılması, birgə layihələrin həyata keçirilməsinin əhəmiyyəti qeyd olunub.
Sonda qonaqlar Mərkəzdə xatirə şəkilləri çəkdiriblər.
21.06.2022